زهور شنوف ـ الو سبيكتور راك تسمع فيا! راك وحدك! لالا راني لايف في انستغرام
بواسطة
2020-07-20 03:48:10
حجم الخط:
زهور شنوف
والي المسيلة يقول بان فيديو سيدي عيسى، صوره مجهولون سوطاو من فوق الحيط وقاموا برمي جثة ميت بالكورونا وتصويرها للاساءة لمنعرف واش!
فرضا صدقنا هذه الفرضية غير المنطقية، تاع واحد قاعد في غرضو جاه الكلب وسوطا م الحيط و"كركر" جثة لمنتصف الباب وصورها بذلك الشكل، والنفايات حملوها فالطاكسي الطائر لداخل المستشفى ولا سوطات معهم ولا كيفاش! وهذا السبيطار مافيهش مسؤولين ولا موظفين ولا مرضى يشوفوا هذا الفعل الشنيع ويوقفونه! وين راحوا الخدامين ولا سبيطار بهذاك الحجم مافيهش الخدمين غلقتوه بسبب الحجر شغل صال دي فات! ولا وش!
من الاخير العملية الاتصالية تاعكم راها فضيحة، حبسوا م التمسخير هذا رانا في ازمة وفي كل دار راهي الموت تركت اثرا رهيبا ع الناس، اذا اخذنا بالارقام الرسمية فقط، ازيد من الف ميت بلا جنازة ولا حداد ولا حزن! كل واحد عايش جرحو وغالق عليه وانتم تحسبوا الهراء هذا راح يخلع الناس وما تصورش! راكم غالطين العالم تغير والفاكس انقرض، واللي يشوف والدته تحتضر بسبب قارورة الاوكسيجين ماراحش يخمم في التخويف تاعكم بالاسلوب تاع الطولكي ولكي تاع عام دقيوس، احشموا اطلقوا ولاد الناس ووفروا للاطباء الاجهزة والوسائل اللي تحميهم وتحمي المرضى، وتخلي قضاء الله عندما يحل يكون لطيفا على الطبيب وعلى المكلوم..
بلادنا نعرفوها ونعرفو كيفاش تسير ونعرفو سبيطاراتها ونعرفو بلي القادر يداوي في تونس وتركيا ويقدر يزيد لهيه على حساب الامكانيات، والمسؤول يداوي في سويسرا وفرنسا، وسبيطار الزوالية كاش معريفة ولا مكاش انت وزهرك فاش اطيح.. الوقت ليس مناسب للوم احد على هذا الوضع، لان اللوم لا راح ينقص عدد المصابين ولا راح يحيي اللي ماتوا ولا راح يعتذر للاطباء اللي راهم يتعرضوا للمهانة والضغوطات من كل جهة ولا راح يصبر الناس اللي راها حاسا بالقهر بسبب القضاء والوضعية الكارثية..
هذا المستوى الاتصالي من القاعدة الى القمة، والحلول الامنية تاع اللي يهدر تقولو روحو ارفدوه، لن تخرجنا من عنق الزجاجة، وانما راح تعقد الوضع وتدفع الامور للانحراف أكثر، اخدموا خدمتكم بلا شطيح بلا محارم واستعراض فاشل، زمن العبودية واضربوا يعرف مضربو لم يعد ممكنا منذ سجل مارك بيانات كل العالم في جيبه، وانتم عايشين افلام سبيكتور الطاهر، روحو القاو حلول للمشاكل او على الاقل ابذلوا جهدا لذلك دون كذب وتضليل واختراع مذنب مفترض، حتى يطمئن الناس ويستطيعون العفو رغم الضرر..
شوهد المقال 546 مرة
أرسل إلى صديق
نسخة للطباعة
نسخة نصية كاملة
التعليقات (0 تعليقات سابقة):
أضف تعليقك