زهور شنوف ـ نحن نسخة مشوهة عن النظام!
بواسطة
2020-06-16 03:32:13
حجم الخط:
زهور شنوف
كاين حاجة مهمة لازم نوضحوها.. هي في الحقيقة رانا قريب عامين وحنا ندورو فيها.. نظرية "لكريك" هذي لازم نتخلصو منها، لخاطر حنا كشعب ولا جمهور ولا مواطنين ولا ناس ولا مجتمع.. المهم سموها كيما تحبو.. مجموعة العباد على هذي الجغرافيا، مع بعض رانا نشبهو تماما للنظام، كل ما يتحرك واحد فينا نقلعولو نظرية المؤامرة ونشكك فيما يقوله ويفعله.. مثل النظام تماما اللي يعطس يقلك حبس اجبد الملف تاعو وقلعلو الطروا دي 3D وvيريفيه.. امممم هذا ايادي اجنبية الحلوف هاه راكم تشوفو النوايا التخريبية تاعو!..
الناس اللي خرجت البارح في ورڤلة ما كفرت ما خسرت ماخربت ما ادعات ان لها علاقة بالحراك او لا ضده.. ومارهيش مضطرة اصلا تنسجم مع الحراك، الاحتجاج حق دستوري والشارع ملك الناس كلها.. الشارع كان مليان عن اخره والناس كانت بالمئات في تجمع سلمي يطالب بالتنمية والحقوق البسيطة لعيش حياة كريمة.. التشكيك والانتقاد باللفظ الواطي الحقير اللي نعتوهم بيه بعض الاشخاص كان مخجل.. ناس عايشا بعد قرن م الاستقلال بلا مستشفيات في وقت المرض من حقها تثور وتقول حقي فالعلاج، بلا عمل في وقت الحجر من حقها تهدر على لقمة عيش كريمة، وين راهي كرامة انسان ما يقدرش يقاوم بدون دخل ثلاثة أشهر؟ يعني عايش النهار بالنهار وياربي! ناس عايشا بلا امكانيات في صحراء الجمل يرعف فيها في هذا الفصل، هل لازم نتجاهلو كل هذا ونصدقو نظرية المؤامرة... حبسو هذي ثورة جياع.. هذي مخطط لها من قبل النظام او اذرع النظام.. والشيء الرائع في المساء كاين شكون قال ان الحي اللي تظاهر مافيهش حتى قنوات الصرف الصحي في هذا العصر.. وتقلي المؤامرة!
ايه عندنا نظام خامج ووقح وسافل ويدير بزاف صوالح مالازمش تندار، لكن الناس هذو خرجو سلميين ورد الفعل الطبيعي والمبدئي ان المجتمع يدعمهم، اللي راهم خايفين ع الحراك يتأثر راه عندهم تقييم خاطئ للحراك.. الحراك ولد من قناعة حقيقية وقد ما ضعف بقى قوي، لان الناس اللي تخرج فيه محددين هدفهم وعارفين شكون عدوهم، وفاهمين بشكل جيد واش اللي لازم يتحقق باش يطمنو ويرجعو لحياتهم الطبيعية، لان الاغلبية تحتاج بلد فيه عدالة وقانون وهوامش اساسية للحرية، ماشي فتات ريعي ومناصب على حساب البقية.. واللي عندو شك يراجع شعارات ووجوه جمعات الحراك واحدة بعد الاخرى..
الاخ صاحب المنشور اللي تناقله الجميع أمس يحذر من وجود من يقف وراء تجمع ورڤلة، مخاوفه مشروعة، وربما يعرف المكان وناسو افضل منا، وما قاله اكيد فيه حرص كبير على مصلحة الجميع ولكنه ايضا لم يستطع نفي ان هناك ناس خرجت من اجل المطالبة بحياة نظيفة وكريمة تحسسها بكرامتها الانسانية، لهذا لازم نطمئن لبعض ونقف مع بعض، ونحبسو هذا الاستصغار تاع المطالب الاجتماعية، لان الغاية من السياسة ان نمتلك اليات توفر للناس حياة محترمة، في الاخير كل شيء يصب في السياسة ولكن لكل زاوية خصوصيتها.. اذا كان هناك شيء غير نظيف راهي ريحة الكتان تكبر وتبان، مكان لاه نجلدو بعضانا لمجرد وسواس ان "مول لكريك" راح يقلي ماعنديش..
شوهد المقال 275 مرة
أرسل إلى صديق
نسخة للطباعة
نسخة نصية كاملة
التعليقات (0 تعليقات سابقة):
أضف تعليقك